எரிமலையில் ஓர் ஈரநீர் அருவி
ஈரோட்டில் உதித்ததோ
எரிக்கின்ற சூரியன்;
நீயோ, அதன்
சுடர் நெருப்பை வாங்கிச்
சூடாற்றிக்
குளிர் ஒளியாய் மாற்றிக்
கொடுத்த நிலா.
பெரியாரோ காட்டுத்தீ;
நீயோ அந்தத்
தீயினில் ஏற்றிய
திரு விளக்கு.
அதிசயம்தான்;
ஓர் எரிமலையில்
ஈரநீர் அருவி
எப்படித் பிறந்தது?
கரடு முரடான
முள் தோலுக்குள்
கனிந்த பலாச் சுளை நீ.
முகத்தையும்
முகவரியையும்
தொலைத்த தமிழன்
மூட நம்பிக்கைகளில்
உறங்கிக் கொண்டிருந்தான்.
அவனைத்
தட்டி எழுப்பினார்
தந்தை; தனயனோ
‘வெட்டிவா! பகையை’ என
வீரவாள் அவன் கையில்
கொடுத்து வரலாற்றின்
கொள்கைப் போர் தொடங்கிவைத்தான்.
(‘விதைபோல் விழுந்தவன்’ புத்தகத்திலிருந்து…)
– கவிக்கோ அப்துல் ரகுமான்