தலையங்கம்:அண்ணல் அம்பேத்கர் பிறந்த நாள்

“சமத்துவ நாள்” அறிவித்த முதல்வருக்குப் பாராட்டு!

தமிழ்நாட்டின் ஒப்பற்ற முதலமைச்சரான ‘சமூக நீதிக்கான சரித்திர நாயகர்’ மு.க.ஸ்டாலின் அவர்கள், புரட்சியாளர் டாக்டர் பி.ஆர்.அம்பேத்கர் அவர்களின் பிறந்த நாளை (14.4.2022) தமிழ்நாடு அரசு சமத்துவ நாளாக இனி கொண்டாடும் என்று நேற்று (13.4.2022) சட்டப் பேரவையில் அறிவித்திருப்பது, தித்திக்கும் தேன் போன்ற வரவேற்கப் படவேண்டிய வரலாற்று சிறப்புமிகுந்த பிரகடனமாகும்.

அண்ணல் அம்பேத்கருக்குத்

தமிழ்நாடு அரசு செய்துள்ள சிறப்பு!

பகுத்தறிவுப் பகலவன் தந்தை பெரியார் பிறந்த நாளான செப்டம்பர் 17ஆம் தேதியை சமூகநீதி நாளாக அறிவித்து, உறுதிமொழி ஏற்கச் செய்து, ஓர் அமைதிப் புரட்சிப் பொன்னேட்டை, திராவிட மாடல் ஆட்சியின் வரலாற்றில் இணைத்தார்.

நேற்று அறிவித்திருக்கும் அறிவிப்பு மிகவும் பாராட்டி _ வரவேற்கப்படும் _ திராவிட இயக்க சாதனை மகுடத்தில் மற்றுமோர் ஒளிமுத்தே!

காரணம், தந்தை பெரியாரும், டாக்டர் அம்பேத்கரும் புரட்சிக் கருத்துகள், சமத்துவ இலட்சியங்களுக்காகப் போர் புரிந்து, போராயுதங்களைத் தரும் அறிவாயுதத் தொழிற்சாலைகள்.

ஒரே (கொள்கை) நாணயத்தின் இரண்டு பக்கங்கள்.

டாக்டர் அம்பேத்கரின் பேசப்படாத ஜாதி ஒழிப்பு மாநாட்டின் தலைமையுரையை, 1936_லேயே உரிமை பெற்று, தமிழிலேயே வெளியிட்டு, அம்பேத்கரை தமிழ்நாடு அறிந்து, வியந்து பாராட்டும்படி செய்தவர் தந்தை பெரியார்.

முதல் சந்திப்பின்போது அறிஞர் அண்ணா உடன் இருந்தவர்; இருவர் உரைகளையும் இருமொழிகளிலும் மொழி பெயர்த்தவர்.

தமிழ்நாட்டில் அம்பேத்கர் பெயரில் கல்லூரி –

சட்டப் பல்கலைக் கழகம்

அம்பேத்கர் பெயரில் சென்னை வியாசர்பாடியில் அரசு கல்லூரி அமைத்தவர் நமது முத்தமிழ் அறிஞர் கலைஞர். பிறகு அம்பேத்கர் பெயரில் தமிழ்நாடு சட்டப் பல்கலைக் கழகம் தலைநகர் சென்னையில்!

அம்பேத்கர் பிறந்த மண்ணில் அவர் பெயரை ஒரு கல்லூரியில் இணைத்தமைக்காக கடுமையான எதிர்போராட்டம் நடந்தது; தமிழ்நாட்டிலோ பலத்த வரவேற்பு. இதுதான் பெரியாரின் சமூகநீதி மண்ணின் தனிச்சாதனை; திராவிட மாடல் ஆட்சியின் இலட்சியங்களை இலக்காக்கிய சுயமரியாதை பூமியின் தனித்தன்மை!

தந்தை பெரியார் தம் வாழ்நாளில், அதிக தடவை சந்தித்த தலைவர் டாக்டர் அம்பேத்கர் அவர்களே!

தமிழ்தான் இந்தியா முழுவதிலும் பரந்து இருந்த மொழி _ நாகர்களின் மொழி என்று ஆய்வுடன் எழுதியவர் அண்ணல் அம்பேத்கர்.

பர்மாவில் உலகப் பவுத்தர்கள் மாநாட்டில்  தந்தை பெரியாரும் –

அண்ணல் அம்பேத்கரும்!

1953ஆம் ஆண்டு பர்மாவில் தந்தை பெரியாரும், டாக்டர் அம்பேத்கரும் ஒன்றாக உலக பவுத்தர்கள் மாநாட்டில் கலந்து கொண்டனர். அப்போதுதான் டாக்டர் அம்பேத்கர் பவுத்தம் தழுவுவதற்கான முடிவின் இறுதி வடிவத்தை தந்தை பெரியாரிடம் கூறியபோது,

‘’நீங்கள் பெருங்கூட்டத்துடன் சேருங்கள்’’ என்று யோசனை கூறியவர் தந்தை பெரியார்.

நாகபுரியில் 5 லட்சம் பேருடன் பவுத்த நெறிக்கு மாறினார் அம்பேத்கர் என்பது வரலாற்றுச் சுவடுகள்!

மனுதர்மத்தை எரித்த இருவரும் _ சமத்துவ,  பெண்ணுரிமைப் போராளிகள் _ இருபெரும்  தத்துவத் தலைவர்கள்!

அதனால் அந்தச் சுடரை அணையாது கொண்டு செல்கிறார் தமிழ்நாட்டின் திராவிட மாடல் ஆட்சி சிம்மாசனத்தில் அமர்ந்துள்ள நமது முதலமைச்சர்.

வருணாசிரம வேரை நொறுக்கச் சொன்னவர் அண்ணல் அம்பேத்கர்

ஜாதியை ஒழிக்க அதன் ஆணிவேரான வர்ணதர்மம், சனாதன அடிபீடத்தை நொறுக்கச் சொன்னவர் டாக்டர் அம்பேத்கர்.

அவரது பிறந்த நாளை, சமத்துவ நாளாகக் கொண்டாட அறிவித்திருப்பது, அனைத்துத் தரப்பு “அடிமை வகுப்பினரையும்’’ (“Servile Classes’’ எஸ்.டி., எஸ்.சி., ஓ.பி.சி., அனைத்து ஒடுக்கப்பட்ட மக்களையும்) ஒன்றுபடுத்தி _ சமப்படுத்தி இச்சொற்றொடரோடு இணைத்துக் கூறியதாகும்.

ஜாதியை, ஜாதி தர்மத்தைப் பரப்பிடும் மத நூல்களான இராமாயணமும், கீதையும் சமத்துவத்திற்கு எதிரான நூல்களே என்று துணிவுடன் _ தந்தை பெரியார் போன்று அன்றே பேசிய, எழுதிய, அறிவு நாணயம் மிகுந்த தலைவர்.

திராவிட மாடல் ஆட்சி இதுதான்!

திராவிடர் இயக்கத்தின் ஜாதி ஒழிப்பு, சுயமரியாதை, சமத்துவம், பகுத்தறிவு, சமூகநீதி என்பது வெறும் நீர் எழுத்துகள் அல்ல; பாறையின் செதுக்கல்; லட்சியப் பயணத்தின் தொய்வில்லா சாதனை என்பதை நமது முதலமைச்சரின் இந்த அறிவிப்பு நிரூபித்து, திராவிட மாடல் ஆட்சியின் மாண்பை, மலை உச்சி விளக்கொளி ஆக்கிக் காட்டுகின்றது.

«««

சனாதன தமிழ் வருடப் பிறப்பை கொண்டாடுவதா?

தை முதல் நாளே தமிழ்ப் புத்தாண்டு

சித்திரையில் தமிழ்ப் புத்தாண்டு என்பது பண்பாட்டுப் படையெடுப்பினால் ஏற்பட்ட விளைவு!

இந்த ‘வருஷம்‘ இந்தப் பண்பாட்டுப் படையெடுப்புக்குப் புத்தாக்கம் தரும் வகையில் _ இதற்குமுன் எப்போதும் இல்லாத கொண்டாட்டம் ஆளுநர் மாளிகையில் _ ராஜ் பவனில்! அழைப்பிதழ் அனுப்பிக் கொண்டாடும்! சனாதன மீட்டுருவாக்க பண்டிகைக் கொண்டாட்டமா இது?

செம்மொழி தமிழுக்குக் காட்டாத ஆர்வம், ‘‘தமிழ் வருஷப் பிறப்புக்குத்’’ தேநீர் விருந்து உபச்சாரம் தடபுடல் ஏன்? ஆரிய மாயை அங்கே ஆட்சி செலுத்தும் இப்போதைய நிலையால்!

மக்களால் தேர்ந்தெடுக்கப்பட்ட ஒரு முதலமைச்சர்; அவரது ஆட்சியில் அண்ணல் அம்பேத்கர் பிறந்த நாளை சமத்துவ நாளாகக் கொண்டாடிட அரசு அறிவிப்பு! உறுதிமொழி ஏற்பு!

ஆனால், அதே நாளில், அங்கே (ஆளுநர் மாளிகையில்) சனாதனச் சங்கமம்!

இரண்டு பண்பாட்டுக் கத்திகள் ஒரே உறையில்.

தமிழ்ப் பெருமக்களே, இந்தப் பனிப்போர் மூட்டத்தைப் புரிந்துகொள்ளுங்கள்!

– கி.வீரமணி,

ஆசிரியர்