சதிவலை கிழித்த அண்ணல் அம்பேத்கர்
– தமிழேந்தி
ஆமையைப் போல
அடங்கிக் கிடந்திட்ட
ஊமைச் சனங்களுக்கு
உச்சரிப்புத் தந்தவன் நீ !
ஆண்டவன் பேர்சொல்லி
ஆல்போல் தழைத்திருந்த
தீண்டாமை யின்வேரில்
தீவைக்க வந்தவன் நீ !
தலையெழுத் தெனச்சொல்லித்
தற்குறிகள் ஆக்கிவைத்தார்
கலைமகளை உன்தன்
காலடிக்கீழ் வைத்தவன் நீ !
மாளிகையில் மட்டுமே
விடுதலையின் வெளிச்சம்; அதை
ஓலைக் குடிசைக்கும்
உள்ளிழுக்க முயன்றவன் நீ !
தொட்டால் தீட்டென்றும்
பார்த்தால் பாவமென்றும்
சட்டங்கள் செய்தோர்
சதிவலைகள் கிழித்தவன் நீ !
மகாத்துமா மகிமை
மயக்கத்தில் பலரிங்குச்
சுகங்கண்டார்; அன்னார்
சூழ்ச்சிகள் ஒழித்தவன் நீ !
காரணைகள் வெண்மணிகள்
கணக்கு முடியவில்லை
தாமிர வருணித்
தண்ணீரும் காக்கவில்லை
என்றாலும் அண்ணலே
எழுச்சி தெரிகிறது
வென்றிடுவோம் என்னும்
நம்பிக்கை விரிகிறது.
(தமிழேந்தி கவிதைத் தொகுப்பிலிருந்து…)
படைக்குல மறவர் அம்பேத்கர்
– கவிஞாயிறு தாராபாரதி
‘ஆதிக் குடிமகனை
ஆதிக்கக் குடிமக்கள்
வீதிக்கு அனுப்பிவிட்டு
வேற்றுமைகள் பேசுவதா?’ – என
பாதிக்கப் பட்டவர்க்குப்
பரிந்துரை யானதுடன்
நீதிக்குக் குரல்கொடுத்து
நிமிர்ந்தெழுந்தார் அம்பேத்கர்!
ஆண்டாண்டு காலம்
அன்னை நாட்டில்
அடிபதிக் கின்ற
மக்கள் பதிப்பில்
‘தடைகளைத் தகர்’ – என
தன்னம்பிக்கை யூட்டிய
படைக்குல மறவர்நம்
பாபா அம்பேத்கர்!
முற்பட்ட சாதிகட்கே
மூலதனம் மூளையென்று
கற்பித்த தப்பிதத்தைக்
களைந்தெறிந்த மாமனிதர்!
(‘இன்னொரு சிகரம்’ தொகுப்பிலிருந்து…)