புற்றுநோயைத் தடுக்கும் தொண்டறப் பணி தொடக்கம் !!
நமது இயக்கத்தைப் பொறுத்தவரை, வரலாற்றுப் பெருமையை – கால வளர்ச்சியில் திளைக்கும்போது – வெறும் வெளிச்சம் போட்டுக் காட்டிடும் விழாக்களாக மட்டும் அவற்றை நடத்தி முடித்திடுவதில்லை.
வெள்ளி விழா (25 ஆண்டுகள்), பொன்விழா (50 ஆண்டுகள்), வைர விழா (60 ஆண்டுகள்), பவள விழா (75 ஆண்டுகள்), நூற்றாண்டு விழா என்ற வரலாற்று மைல் கற்களைச் சுட்டிடும்போதுகூட புதியதோர் லட்சியப் பாதை யில், மேலும் ஊக்கத்தோடும், உற்சாகத்தோடும் பயணிக்க வேண்டும் என்பதே பகுத்தறிவாளர்களாகிய பெரியார் தொண்டர்களின் நோக்கமும், செயலுமாகும்.
அதன் அடிப்படையில்தான் 1979 இல் தஞ்சையில் திராவிடர் கழகத்தால் தரப்பட்ட 100 பவுன்களை (அப்போது பவுன் விலை 800 ரூபாய்தான்!) மூல நிதியாக வைத்தே, பெரியார் நூற்றாண்டு பாலிடெக்னிக்கைத் தொடங்கினோம். (அன்னையார் மறைந்து நான் பொறுப்பேற்றுச் சில மாதங்களில்) நூற்றாண்டு அய்யாவுக்கு வந்த நிலையில் – ஓராண்டு முழுவதும் பிரச்சாரமாக மாவட்டத் தலை நகர்களில் விழா எடுத்தோம். (எம்.ஜி.ஆர். அவர்கள் தலைமையில் அமைந்த அரசும் ஓராண்டு விழா நடத்தியது).
திருச்சியிலும் ஒரு மெட்ரிகுலேசன் பள்ளி நூற்றாண்டு நினைவாகத் தொடங்கப் பெற்றது.
ஆக்க ரீதியாக நம் அய்யாவின் கொள்கைகள் சமுதாய வளர்ச்சிக்கு உதவிடும் வகையில், நூற்றாண்டு நினைவு பாலிடெக்னிக் – தொழில் நுட்பக் கல்லூரியை தஞ்சை வல்லத்தில் தொடங்கி, அது தனது 32 ஆம் ஆண்டில் பீடுநடை போட்டு, கனடா அரசாலும், தமிழ்நாட்டு அரசாலும் தலைசிறந்த கல்லூரி என்ற விருதினைப் பெற்று வளர்ந்து வருகிறது.
அதுபோலவே, எனக்கு எடைக்கு எடை வெள்ளிக் கட்டிகள், தங்கம், புதுக்கோட்டையிலும், தஞ்சையிலும் என்றும் நினைவில் வாழும் கழகப் பொருளாளர் கா.மா. குப்புசாமி அவர்களது பெருமுயற்சியால் மக்களால் அளிக்கப்பட்டது.
மூன்று கோடி ரூபாய் மூலதன நிதியாகித் தான் தஞ்சையில் உலகின் முதல் பொறியியல் கல்லூரி – பிறகு அது வேக வளர்ச்சி பெற்று பெரியார் – மணியம்மைப் பல்கலைக் கழகமாய் தடைக்கற்களைத் தாண்டி – வளர்ந்தோங்கி உலகத்தாரின் மலைப்பைப் பெறுகிறது.
மேனாள் குடியரசுத் தலைவர் அறிஞர் ஏ.பி.ஜே. அப்துல்கலாம் போன்றவர்கள் – அதன் சாதனைபற்றி அவர்தம் நூலில் எழுதிப் பாராட்டி ஊக்குவிக்கிறார்கள்! இன்னும் பல உண்டு.
பெரியார் சுயமரியாதைப் பிரச்சார நிறுவனம் என்ற தந்தை பெரியார் அவர்கள் உருவாக்கிய அறக்கட்டளையின் உண்மை வயது 81 ஆண்டுகள் (1931 லேயே நிறுவப்பட கருத்துரு கொள்ளப்பட்டது). ஆனால், அதிகாரப்பூர்வமாக பதிவு செய்யப்பட்டது 1952, செப். 23; அதற்கு இப் போது 60 ஆண்டுகள் என்பதால், வைர விழா எளிமையாக ஆடம்பர வெளிச்சம் இன்றி, ஆக்கப் பணிகளையே அணிகலன்களாக்கி அழகுபட அது நடந்தேறி உள்ளது!
அதில் துவக்கப் பெற்ற திட்டங்களில் – மனித நேயப் பணிகளில் ஒன்று, நமது மகளிருக்கு வரும் புற்றுநோய் களை காலத்தே விரைந்து அறிந்து கொண்டு சிகிச்சை மூலம் பாதிப்பு உள்ளவர்களைக் காப்பாற்றிட முடியும் என்ற விழிப்புணர்வை, சோதனைகளை நடத்திட (தக்க மருத்து வர்கள்மூலமாக) நடமாடும் ஊர்தி – மருத்துவமனையுடன் கிராமப்புறங்களுக்குச் சென்று சிகிச்சை அளிப்பது என்பதை வாரத்திற்கு ஒருமுறை (டாக்டர்கள் விடுமுறை நாள்களாக 2 நாள்களைத்தான் ஒதுக்கிடும் நிலை இருப்பதால்) சென்று ஆய்வு – மருத்துவம் – அறிவுரை வழங்கிடும் ஏற்பாட்டின் தொடக்க விழாவும் நடைபெற்றது.
அறக்கட்டளை இதற்குரிய மூலதனச் செலவினை ஏற்றுள்ளது என்றாலும்கூட, வாரந்தோறும், மருத்துவர்களாக பணிபுரிவோர் – இவர்களுக்காகும் குறைந்தபட்ச செலவு எல்லாம் சேர்த்து ரூபாய் 22,000 (இருபத்தி இரண்டாயிரம்) ஆகலாம்.
மாதம் ஒன்றில் இரண்டு அல்லது மூன்று (வார) முகாம்களை – கிராமங்களில் அமைத்து இந்த மனிதநேயப் பணியைத் தொடங்கிட திட்டமிடப் பட்டுள்ளது.
இந்தியாவில் ஆண்டு ஒன்றுக்கு புற்றுநோயால் மரணம் 4 லட்சம் பேர்
உலக அளவில் ஆண்டுதோறும் ஒரு கோடி மக்கள் புற்றுநோயால் பாதிக்கப்படுகின்றனர். 60 லட்சம் பேர் மரணமடைகிறார்கள்.
இந்தியாவில் மட்டும் ஆண்டு ஒன்றுக்கு 8 லட்சம் பேர் இந்நோயால் பாதிக்கப்படுகின்றனர். 4 லட்சம் பேர் மரணம் அடைகின்றனர்.
ஆட்கொல்லி நோயான புற்றுநோயால் பாதிக்கப்படு கின்றவர்கள் எண்ணிக்கைப் பெருகியே வருகிறது.
இருப்பினும் மருத்துவ ஆராய்ச்சியின் பயனாக, தக்க நேரத்தில் நோய் கண்டறிந்து சிகிச்சை மேற்கொண்டால் எளிதில் குணப்படுத்தி மீள வைக்க முடியும் என்பதால், தடுப்பு முறைகளையும் பிரச்சாரம் செய்து வெல்லலாம்; ஏழை, எளிய கிராமத் தாய்மார்கள் மத்தியில் இத்திட்டம் தொடக்கத்தின்போதே நல்ல வரவேற்பைப் பெற்றுள்ளது!
புற்றுநோய் மருத்துவர் திரு. டாக்டர் கோவிந்தராஜூ அவர்கள் நடத்தும் அறக்கட்டளை சார்பில் பகுதிச் செலவினை ரூபாய் 11,000 (பதினோராயிரத்தினை) அளிப்பதாக 23.9.2012 திருச்சி விழாவிலேயே அறிவித்தார் பெரும் தொண்டுள்ளத்தோடு!
விடுதலை இணையத்தில் படித்த சிகாகோ பெரியார் பன்னாட்டு அமைப்பைச் சேர்ந்த திருமதி அருள்செல்வி – பாலு அவர்கள் (தொலைப்பேசி வாயிலாக) ஒரு வாரச் செலவை தனது குடும்பம் ஏற்பதாக அறிவித்துள்ளார்.
தங்களது பெற்றோர்கள், உற்றார், உறவினர்கள் நினைவாக ஒவ்வொரு வாரச் செலவுத் தொகையை வசதியும், தரும உள்ளமும் படைத்தவர்கள் அனுப்பினால், அந்தந்த வாரம் என்று முறையாக அவரவர்கள் பெயர்கள் பதிவு செய்து First Come First Served என்ற முறையில் அவரவர்கள் அறிவிக்க விரும்பும் பெயர்களால் அந்த வார அறப்பணி நடைபெறும்.
இதற்கென நன்கொடை அளிக்க விரும்புபவர்கள், வெளிநாட்டவர்களானால் தங்களது நன்கொடைகளை “Periyar Maniammai Institute of Science and Technology’’ என்ற பெயரில் Drafts வரைவோலை எடுத்து அனுப்புவ தோடு, விவரமான கடிதம் ஒன்றையும் அதன் தலைவருக்கு அனுப்பி வைக்கலாம்.
உள்நாட்டவர்கள் ஆனால், வரைவோலைகளை – செயலாளர், பெரியார் சுயமரியாதைப் பிரச்சார நிறுவனம் “Secretary, The Periyar Self-Respect Propaganda Institution” என்ற பெயரில் Cross செய்து, கடிதத்துடன் அனுப்பிடலாம்.
அனைத்து மக்கள் பங்கு பெறும் இயக்கமாக (Campaign) இது நடந்தால்தான் இதற்குப் பெருமை என்பதால் இவ்வேண்டுகோள்.
இந்தத் தொண்டறப் பணிகளை எப்படியும் துண்டு ஏந்தியாவது தொய்வின்றி நடத்திடும் திட சித்தம் உள்ள தோழர்கள், தோழியர்களுடன் இந்த வைர விழாவில் புதியதோர் மனிதநேயப் பணி நல்ல துவக்கமாகி தொடருகிறது.
ஏற்கெனவே தஞ்சையில் பல ஆண்டுகளாக, நீதியரசர் ஜஸ்டீஸ் ணி. பத்மநாபன் அவர்களால் தொடங்கப் பெற்று சிறப்புடன் பணியாற்றி வருவதன் (புற்றுநோய் தடுப்பு – ஆய்வு) இரண்டாவது கட்டப்பணி இது.
மேலும் பாய்ச்சலுடன் (Deep Forward) தனது பயணத்தை நடத்திடும்.
தஞ்சை புரா கிராமங்களில், இப்பணி தொடரக்கூடும்.
கடவுளை மற; மனிதனை நினை! – தந்தை பெரியார்.
கி.வீரமணி
ஆசிரியர்