– கவிஞர் மாரி.விசுவநாதன்
இறைவா யென்று கூறித் தொழுது
குறையைச் சொல்லிடுவார் – பொய்
திரையை யிட்டு பூசை யென்று
பொருளைத் திருடிடுவார்! – இவர்
மறையே யென்றுகூறும் மொழியில்
பொய்யை யுரைத்திடுவார் – இதை
மதியால் ஆய்ந்தால் தெரியும் திருடர்
சதிதான் என்றிடுவாய்!
வாழு முயிரை வருத்தும் மூடர்
விதியை யுரைத்திடுவார் – இவர்
தாழ்வும் உயர்வும் இறைவன் தந்தான்
என்றே யுரைத்திடுவார் – இவர்
ஆழ நீரில் மூழ்க நேரின்
அலறித் துடித்திடுவார் – இவர்
தாழும் நிலையை யடைந்தால் நீதி
முறையை யுரைத்திடுவார்!
வல்ல இறைவ னென்றே சொல்லி
கோயில் சென்றிடுவார் – இவர்
பொல்லா எலியாய் மாறிக் கோயில்
பொருளைத் திருடிடுவார் – இவர்
தொல்லை அகல துயரும் நீங்க
பூசை என்றிடுவார் – இவர்
தொந்தி யுடலைப் பேணப் பொருளை
முந்தித் திருடிடுவார்!
கல்லா மூடர் நம்பா ரிறையை
என்றே கூறிடுவார் – இவர்
எல்லாம் தெரிந்த ஞானி போல
இறைவன் என்றிடுவார் – இவர்
சொல்லால் செயலால் திருட்டுத் தொழிலை
மெதுவாய்ச் செய்திடுவார் – இறை
இல்லை யென்றே உணர்ந்த தாலே
கொள்ளை யடித்திடுவார்!
பத்தி மோக வலையை வீசும்
யுத்தி யறிந்திடுவார் – மறை
சத்தி இறைவ னென்றே கூறி
சதியை மறைத்திடுவார் – இவர்
குக்கல் போல குரைத்து உரிமை
குரலைத் தடுத்திடுவார் – நாடு
நக்கல் நிலையை யடைய மக்கள்
நலத்தைக் கெடுத்திடுவார்!
மதத்தின் சின்னம் அணி வீரென்று
இதமாய்க் கூறிடுவார் – இவர்
கதியே மதந்தா னென்று கூறி
கண்ணைக் கெடுத்திடுவார் – உயர்
மதியின் செயலை அறவே மறைத்துக்
குழியைப் பறித்திடுவார் – இவர்
சதியை யறியா மூடர் மதத்தின்
குழியில் வீழ்ந்திடுவார்!
மதியைக் கெடுக்கும் மதுவாம் மதத்தைச்
சதியால் கொடுத்திடுவார் – அந்த
மதுவாம் மதத்தை அருந்தும் மனிதனை
மந்தியாய் ஆக்கிடுவார் – அவர்
குதியாய்க் குதிக்கச் சமயக் கோலைக்
கொண்டே ஆட்டிடுவார் – மூடர்
விதியை நம்பக் கதைகள் கூறிக்
காதை அறுத்திடுவார்!
மோட்ச மென்று கூறி ஆசை
ஆட்சி வளர்த்திடுவார் – இறைக்
காட்சி காணக் கோயி லென்று
காசைப் பறித்திடுவார் – இறை
மாட்சி யென்று பொய்யை யுரைத்து
சூழ்ச்சி புரிந்திடுவார் – இதை
நாட்டில் விளக்கி மறுத்து ரைத்தால்
நாத்திக ரென்றிடுவார்!
(‘வெடிகுண்டு’ தொகுப்பிலிருந்து….)