மரபு வழி – மரண வழியா?

விவாதிக்கும் தொடர்

-ஜானகிராமன்

மரபு வழி – மரண வழியா?

இந்தியாவின் உண்மையான சிக்கல்களான ‘பார்ப்பனியம், வர்ணாசிரம தீண்டாமை, முதலாளித்துவ சுரண்டல்’ போன்றவற்றைப் புறக்கணித்து மொழி ரீதியிலான அரசியல் என்று ‘வேற்று மொழி பேசுவோர் மீது வன்மத்தை உருவாக்கும்’ போலி தமிழ்த் தேசிய அரசியல் செய்யும் ‘ஒரு குழு’ தற்போது ‘மரபு வழி மருத்துவம்’ என்ற ஆதாரமற்ற மூடநம்பிக்கைக் கருத்துகளை இணையம் வழியே பரப்பத் தொடங்கியுள்ளது.

இந்தக் குழு அறிவியல் மருத்துவத்தை எதிர்ப்பதற்கான காரணம் மிகவும் வேடிக்கையானது, அதாவது இவர்கள் ‘தமிழ்’ என்ற மொழியை அடிப்படையாக வைத்து இயக்கம் நடத்துபவர்கள். அதனால் ‘ஆங்கில மருத்துவம்’ என்பதை எதிர்க்கின்றனராம்.

மேலும் விளக்கமாகக் கூறுவோமேயானால் இது ஆங்கில வழிக் கல்வியை எதிர்ப்பது போன்ற மனநிலை ஆகும். அதாவது ‘ஆங்கில மொழி’ ஆதிக்கத்தை எதிர்ப்பது என்ற கோட்பாட்டின்படி  தமிழ் மருத்துவம்’ போன்றவற்றை ஆதரித்து ஆங்கில மருத்துவத்தை விரட்ட வேண்டும் என்பதாகும்.

ஆனால் மீண்டும் மீண்டும் நாம் கூறி வருவது போல் ‘ஆங்கில மருத்துவம்’ என்று  வழக்கத்தில் கூறப்படும் மருத்துவ முறை உண்மையில் ஆங்கில மருத்துவம் அல்ல, அது நவீன அறிவியல் மருத்துவமாகும்.

உலகில் ஆங்கிலமே பேசாத பல நாட்டு ஆய்வாளர்களால் இந்த மருத்துவ முறை வளர்த்தெடுக்கப்பட்டுள்ளது.

ஆங்கில வாடையே அறவே அறியாத ‘சீனா’ வின் மருத்துவ உபகரணங்கள் உலகின் பல பகுதிகளில் பயன்படுத்தப்பட்டு வருகின்றன. கியூபாவின் ஆங்கிலம் தெரியாத மருத்துவர்கள் அண்மையில் எபோலா தாக்குதலின்போது ஆப்பிரிக்காவில் ஆற்றிய பணி நினைவில் கொள்ளத்தக்கது.

இவ்வாறு அறிவியல் மருத்துவம் என்பது மனித குலத்தின் தொடர் அறிவியல் அறிவின் பயனால் கிடைத்த செல்வமாகும். இது நோய்களைப் பகுத்தறிவுப்பூர்வமாக அணுகியதால் கிடைத்த விளைவாகும்.

ஆனால் நாம் எத்தனை முறை இதனை நவீன அறிவியல் மருத்துவம் என்று கூறினாலும் அது காதில் விழாதது போலவே இவர்கள் நடித்து வருகின்றனர். ஏனெனில் அதனை இவர்கள் ஒத்துக் கொண்டால் நவீன அறிவியல் மருத்துவத்திற்கு எதிரான இவர்களின் பிரச்சாரத்தின் அடிப்படையே விழுந்துவிடும். அதனாலேயே தொடர்ந்து ஆங்கில மருத்துவம் என்றே கூறி வருகின்றனர்.

உண்மையில் ஆங்கில மொழிக்கும் இந்த மருத்துவத்திற்கும் எந்தத் தொடர்பும் கிடையாது. தமிழ்நாட்டில் தமிழில் மருத்துவம் பயில கடந்த தி.மு.க. அரசு எடுத்த முயற்சிகள் நினைவில் கொள்ளத்தக்கது.

மேலும் ‘நவீன அறிவியல் மருத்துவம்’ பால்வினை நோய்களை ஏறக்குறைய ஒழித்து விட்ட பிறகு, ரகசிய நோய் மருத்துவர்கள் பணம் ஈட்ட புது வகைத் தந்திரத்தைக் கையாளத் தொடங்கியுள்ளனர். (பாரம்பரிய மருத்துவ முறைகள் இந்தியாவில் நிலவி வரும் மற்றுமொரு மூடநம்பிக்கையே என்ற கட்டுரையில் இது தொடர்பாக விரிவாக நீங்கள் காணலாம். (http://goo.gl/eoE69C)

மக்கள் உயிருக்கும் உடலுக்கும் கேடு விளைவிக்கும் பல்வேறு கருத்துகளை அவர்கள் பரப்பினாலும் மக்களின் உயிருக்கும் நலத்திற்கும் நேரடியாக உலை வைக்கும் இந்தப் போலி மருத்துவர்களின் சில மூடநம்பிக்கைக் கருத்துகளை இங்கு காண்போம்.

மூடநம்பிக்கைக் கருத்து 1: பிரசவத்திற்கு மருத்துவமனை செல்ல வேண்டாம்.

பிரபல தனியார் செய்தித் தொலைக்காட்சியில் வேலை செய்யும் ஒரு நபர் தன்னுடைய மனைவி கர்ப்பமான போது எந்த விதப் பரிசோதனை-களுக்கும் மருத்துவமனை அழைத்துச் செல்லவில்லை என்றும், இறுதியில் பிரசவம் எந்தவித மருத்துவ உதவியும் இன்றி வீட்டிலே பார்த்ததாகவும் இணையத்தில் சில மாதங்களுக்கு முன்பு பதிவிட்டிருந்தார்.

இந்தச் செய்தியைப் படித்தவுடன் ‘உலகம் முழுவதும் அனைத்து வன்முறைகளிலும் பெண்களும் குழந்தைகளுமே’ கடுமையாகப் பாதிக்கப்-படுகின்றனர் என்ற பழமொழிதான் நினைவில் வந்தது.

நூறாண்டுகளுக்கு முன்பு ஒரு பெண் கருவுற்றால் அவள் பிரசவத்தின் போது பிழைப்பாளா? குழந்தை உயிர் பிழைக்குமா? என்பது யாருக்கும் தெரியாது நிறைமாதக் கர்ப்பிணிக்கு ‘வளையல்’ அணிவிக்கும் நிகழ்ச்சியும் அதனாலே நடத்தப்பட்டது.

19ஆம் நூற்றண்டில் 1000 பெண்கள்  கருவுற்றால் அதில் சுமார் 100 பெண்கள் உயிர் இழந்து விடும் நிலை இருந்தது. அதனாலேயே ‘தாயில்லாப் பிள்ளை, சித்தி கொடுமை போன்ற சொற்கள் வழக்கத்திலிருந்தன.

ஆனால் தற்போது நவீன அறிவியல் மருத்துவத்தின் பேறுகாலக் கவனிப்புத் திட்டத்தின் பலனாகவும் ‘சிசேரியன் எண்ணிக்கை அதிகரித்துள்ளதாலும் ‘ தமிழ் நாட்டில் ஒரு லட்சம் பிரசவத்திற்கு ஒரு பெண்தான் மரணமடைகின்றார் என்ற நிலை நிலவுகின்றது. உலக சராசரியானது ஒரு லட்சத்துக்கு 400 ஆகும். http://en.wikipedia.org/wiki/Maternal_death#mediaviewer/File:SOWM2010_maternal_mortality_map.svg

என்ற இணைப்பில் உலகில் எந்த எந்தப் பகுதியில் எவ்வளவு பிரசவ கால மரண விகிதம் என்று நீங்கள் அறியலாம். மேலும் ஒவ்வொரு 7 பிரசவத்திற்கும் ஒரு பெண் மரணமடையும் ஆப்பிரிக்க நாடுகள் இன்றும் உள்ளன என்பதையும் கவனிக்கவும்.

பிரசவகால மரணத்திற்கு ஆயிரக் கணக்கான காரணங்கள் உள்ளன. அதனை பிரசவத்திற்கு முன்பு ஏற்படும் சிக்கல்கள், பிரசவத்தின்போது ஏற்படும் சிக்கல்கள், பிரசவத்திற்குப் பின்பு ஏற்படும் சிக்கல்கள் என்று மூன்று வகையாகப் பிரிக்கலாம்.

இதில் பிரசவத்தின் போது ஏற்படும் சிக்கல்கள் மிகவும் மோசமானவை, அதிக மரணங்களை ஏற்படுத்தக்கூடியவை. அதில் முக்கியமானது ‘கட்டுப்படாத ரத்தப்போக்கு’ மற்றும் குழந்தை வெளியே வர இயலாத நிலை (obstructed labour) போன்றவையாகும்.

குழந்தை வெளியே வர இயலாத நிலை கருப்பையில் குழந்தை தலைகீழாக இருப்பது (breech),, தலையை நஞ்சுக்கொடி சுற்றி இருப்பது, தாயின் இடுப்பு எலும்பு சரியான அமைப்பில்(cpd) இல்லாதது என்பன போன்ற பல்வேறு காரணங்களால் ஏற்படுகின்றது.

இந்தப் பிரசவ காலச் சிக்கல்கள் ஒருபுறம் இருந்தாலும், ஏற்கெனவே வேறு நோயால் பாதிக்கப்பட்டுள்ள பெண்கள் எடுத்துக்-காட்டாக ஏற்கெனவே இதய நோய் உள்ளவர்கள், ஏற்கெனவே எச்.அய்.வி தொற்று உள்ளவர்கள் நிலை, ஏற்கெனவே சிறுநீரகப் பாதிப்பு உள்ளவர்கள் (மேலும் பல) கர்ப்பம் தரிக்கும்போது இன்னும் மோசமாகின்றது.

அதேபோல் சாதாரணமாக ஒருவருக்கு வரும் மலேரியா, டெங்கு, காசநோய் போன்ற பலவும் கர்ப்பம் தரித்த பெண்ணுக்கும் வரலாம். அப்போது நிலைமை இன்னும் மோசமாகின்றது. மேலும் பிரசவ காலத்தில் நடைபெறும் உடல் இயங்கியல் மாற்றத்தால் வரும் ரத்த அழுத்தம், அதிக சர்க்கரை, வலிப்பு போன்றவையும் மோசமானவை.

அவ்வாறான சூழலில் மகப்பேறு நிபுணருடன் மேலும் பல சிறப்பு நிபுணர்களின் கவனிப்பும் அந்தப் பெண்ணுக்குத் தேவைப்படும். மேலும் மயக்க நிபுணர், குழந்தைகள் சிகிச்சை நிபுணர், செவிலியர்கள் சுகாதாரப் பணியாளர்கள் என்று பலரின் கூட்டு முயற்சி தொடர்ந்து தேவைப்படுகின்றது.

மேலும் சமுதாயத்தில் பின்தங்கிய கிராமப்புறங்களில் வசிப்போர், மலைவாழ் மக்கள் என்று அனைவருக்குமான தொடர் சுகாதார அமைப்பாக ‘பேறுகாலப் பணியாளர்கள்’ இயங்கி வருகின்றனர். இதனாலே தமிழ்நாடு இந்த சுகாதாரத் திட்டத்தில் இந்தியாவிலேயே முதன்மையாகத் திகழ்கின்றது.

ஆனால் இதைப் பற்றி எல்லாம் ஒரு அறிவும் இல்லாமல் ‘குழந்தை தானாக பிறந்து விடும்’ என்று இந்த மூடர்கள்  கதை அளந்து வருகின்றனர், நார்மல் டெலிவரி எனப்படும் இயற்கை முறைக்கே 100% மருத்துவக் கவனிப்புத் தேவைப்படுகின்றது.

பிரசவம் நிகழும் யோனி பாதையைச்  சரியான முறையில் ஏற்படுத்திக் கொடுக்கவில்லை எனில் மிகவும் மோசமான விளைவுகளை குழந்தையும் தாயும் சந்திக்க நேரும். நாங்கள் பூர்வ குடி, ஆண்ட பரம்பரைக் கதைகள் இங்கே எடுபடாது.

மருத்துவக் கவனிப்பற்று நிகழும் பிரசவத்தினால்  யோனிக்கும், மலத் துவாரம் அல்லது சிறுநீர்ப் பாதைக்கும் இடையே தேவையற்ற தொடர்பு ஏற்படும் வாய்ப்பு உள்ளது. இதனால் சிறுநீர் அல்லது மலம் யோனி வழியே வெளியேறும் இக்கட்டான (rectovaginal fistula) சூழல் எதிர்காலத்தில் ஏற்படலாம். மேலும் மூச்சுத் திணறல் ஏற்பட்டு குழந்தை மூளை வளர்ச்சி குறைந்தவர்களாக மாறும் வாய்ப்பும் உள்ளது.

உலகம் முழுவதிலும் உள்ள பெண்கள் உரிமைக்கான அமைப்புகள் எதுவும் இதுவரை சிசேரியன் முறைக்கு எதிர்ப்பு ஏதும் தெரிவித்ததில்லை. உலகில் கோடிக்கணக்கான முறை சிசேரியன் பாதுகாப்பாக நடந்துள்ளது.

உண்மையைச் சொல்வோமேயானால் பிரசவ வார்டுகளில் பல பெண்கள் வலி பொறுக்க இயலாமல் தங்களுக்கு அறுவை சிகிச்சை செய்துவிடுமாறு மருத்துவர்களிடம் கோரிக்கை வைக்கின்றனர். ‘சீமாங்’ எனப்படும் சிறப்பு மய்யங்கள் மூலம் அரசு இலவசமாக அனைத்துத் தாய்மார்களுக்கும் இலவசமாக சிகிச்சை வழங்குகின்றது.

ஆனால் மருத்துவ அறிவு ஏதும் இல்லாத இந்த நபர்கள் தேவையற்ற விவாதங்களை உருவாக்குகின்றனர்.

மிகவும் பெரிய மருத்துவப் பிரிவான இதனை ஓரளவேனும் கற்க குறைந்தது பத்து ஆண்டுகளேனும் தேவைப்படும் என்ற சூழலில், இது குறித்த மருத்துவக்கூறுகளை நான் உங்களுக்கு முழுவதும் விளக்கும் முயற்சியைக் கைவிட்டு, மருத்துவ அறிவியலை ஓரளவேனும் புரிந்துகொள்ள முயற்சிக்கக் கோருகின்றேன்.

மேலும் தகவல் பெறும் உரிமைச் சட்டம், கல்வி உரிமைச் சட்டம் போல, வலியிலிருந்து விடுதலை பெறும் சட்டம் அதாவது வலி இல்லாமல் ஒருவர் வாழுவது மற்றும் வலி இல்லாமல் ஒருவர் உயிர் இறப்பது ஆகியவற்றை அரசு உறுதிப்படுத்தும் சட்டத்தை (Right for Pain Releif) கோரும் நாள் வெகு தொலைவில் இல்லாதபோது இந்தப் பிற்போக்குவாதிகள் மக்களைப் பின்னோக்கி இழுத்துச் செல்வது வேதனையான விசயமாகும்.

மேலும் பிரசவ காலப் பாதுகாப்பு என்பது இரு குழந்தைகளுக்கு இடையே குறைந்தபட்சம் மூன்றாண்டு இடைவெளி ஏற்படுத்திக் கொடுக்கும் ‘காப்பர் டி’ உள்ளிட்ட தற்காலிகக் கருத்தடை முறையையும் உள்ளடக்கியது.

அடுத்த குழந்தை நலமுடன் பிறக்க, தாய் மற்றும் குடும்பத்தை அதற்காகத் தயார் செய்ய இந்த இடைவெளி பயன்படுகின்றது. பிரசவத்திற்கு மருத்துவமனை போக வேண்டாம் என்பவர்கள் இதைப்பற்றி ஏதும் சிந்தித்துக்கூட இருக்க மாட்டார்கள் என்பது திண்ணம்.

மேலும், பணத்திற்காக மருத்துவர்கள் சிசேரியன் செய்கின்றனர் என்ற வாதம் ஏற்புடையது அல்ல. ஏனெனில், தனியாரில் நடக்கும் சிசேரியன்களின் எண்ணிகையை விட அரசு மருத்துவமனைகளில் நடக்கும் சிசேரியன்களின் எண்ணிக்கை அதிகமாகும்.

மேலும், அரசே அனைத்து மக்களுக்கும் இலவசமாக மருத்துவத்தை வழங்கும் இங்கிலாந்து (national health services) போன்ற நாடுகளில் நடக்கும் சிசேரியன்களின் எண்ணிக்கை இந்தியாவில் நடப்பதைவிட மிக அதிகமாகும்.

நேரடியாகக் கூறுவோமேயானால் மருத்துவக் கவனிப்புடன் கூடிய பிரசவமுறை ‘இறப்பு விகிதத்தைக் குறைக்கும். கவனிப்பற்ற மருத்துவம் இறப்பு விகிதத்தைக் கூட்டும்.

தடுப்பூசி வேண்டாமா? அடுத்த இதழில்